سه‌رۆكێ ئۆفیسا دهۆك یا كۆمیسیۆنا بلندا سه‌ربه‌خۆ یا هه‌لبژارتنێن عیراقێ ڕاگه‌هاند، ئه‌ڤرۆ ده‌رگه‌هێ خوه تۆماركرنێ بۆ هه‌ڤپه‌یمانییان و كاندیدێن سه‌ربه‌خۆ هاته ڤه‌كرن.
خالد عه‌باس سه‌رۆكێ ئۆفیسا دهۆك یا كۆمیسیۆنا بلندا سه‌ربه‌خۆ یا هه‌لبژارتنێن عیراقێ بۆ ئاژانسا خانى دیاركر، ده‌رگه‌هێ خوه تۆماركرنا هه‌ڤپه‌یمانییان و كاندیدێن سه‌ربه‌خۆ ئه‌ڤرۆ 5-3 هاته ڤه‌كرن و دێ هه‌تا 14-3 یێ ڤه‌كرى بیت، هه‌ر حزبه‌كا بڤێت هه‌ڤپه‌یمانییێ بكه‌ت و هه‌ر كاندیده‌كێ بڤێت سه‌ربه‌خوه خوه تۆماربكه‌ت، پێدڤییه د ده‌مێ دیاركریدا سه‌ره‌دانا ئۆفیسا وان بكه‌ت، داكو ڕێنما و ڕێكاران پێشكێشى وان بكه‌ن.
سه‌باره‌ت كورسییێن پارێزگه‌هان و ژماره‌یا كاندیدان ئاشكراكر، ل هه‌ر پارێزگه‌هه‌كێ هه‌ر حزبه‌ك دشێت دوو جاران هندى ژماره‌یا كورسییێن وێ پارێزگه‌هێ كاندیدان تۆماربكه‌ت، بۆ نموونه ئه‌گه‌ر ل دهۆكێ 25 كورسى هه‌بن، هه‌ر حزبه‌كێ دێ ماف هه‌بیت 50 كه‌سان به‌ربژاربكه‌ت، ژماره‌یا ده‌نگێن پارێزگه‌هێ ب گشتى، دێ ل سه‌ر ژماره‌یا كورسییێن پارێزگه‌هێ هێته دابه‌شكرن و هه‌ر حزبه‌ك دێ ل دووڤ ژماره‌یا ده‌نگێن خوه كورسییان ب ده‌ستڤه‌به‌ت.
