سەرۆكێ هەڤپەیمانییا حەمورابی ل دۆر پێنج كۆرسیێن كوتا ڕاگەهاند، شكەستنەكا مەزنە ل دۆر مافێن پێكهاتەیان ل هەرێما كوردستانێ و ئەگەر هەلویستێ سەرۆك بارزانی نەبا، مە ئەو پێنج كورسی ژی ب دەستڤە نەدئینان.
ئانو جەهوەر، سەرۆكێ هەڤپەیمانییا حەمورابی دیاركر، كو ئەم وێ بڕیارێ ڕەتد ناكەین بەلێ شكەستنەكا مەزنە ل دۆر مافێن پێكهاتەیان ل هەرێما كوردستانێ، كۆرسییێن ئەرمەن و ئاشووری و كریستیان وكلدانان بۆ كێمتر ژ نیڤێ هاتینە كێمكرن. ئانكۆ ژ پێنج كورسیان كرینە دوو كورسی و ئەو دوو كورسی یە ژی هاتینە پارچەكرن.
هەروەسا ئاماژە ب وێ چەندێ ژی كر، كو هەبوون و دیموگرافیا پێكهاتەیان 99% ل هەولێرێ و دەڤەرا بادینانە، نێزیكی 200 گۆندێن مە بتنێ ل دەڤەرا دهۆكێ نە. بەلێ ل دەڤەرا هەلەبچە و سلێمانیێ مە ئێك گۆند ژی نینە، ل هەولێرێ ودهۆكێ مە 52 قۆتابخانێن زمانێ سریانی هەنە كو نێزیكی حەفت هزار قوتابی زمانێ سریانی تێدا دخۆینن ب 650 مامۆستا و ستافێ پەروەردێ یێ زمانێ سریانی، بەروڤاژی ل سلێمانیێ وهەلەبچە ئێك قوتابخانا زمانێ سریانی نینە.
سەرۆكێ هەڤپەیمانییا حەمورابی گۆت ژی،” كو ئەم نێزیكی 12 هێزێن سیاسی هەنە و ئێك بارەگایێ وان هێزان ل سلێمانیێ نینە و ئەڤەژی تاوانا پارتی وئێكەتیێ نینە بەلكو دیموگرافیا مەیە و بڕیار هاتبوو دان كو مافێ پێكهاتەیان نەهێلن بەلێ مە كۆمبوون هێشتا یێن ماین.”
دهێتە زانین، كو دوهی دادگەها فیدرال یا عیراقێ بڕیارا دەستەیا دادوەری یا هەلبژارتنان پەسەندكر و ل دویڤ دەقێ بڕیارێ پێنج كورسی یێن پێكهاتەیان ب سەر پارێزگەهێن هەولێر و دهۆك و سلێمانییێ هاتنە دابەشكرن، كو دوو كورسی بوو هەولێر، دوو سلێمانییێ و ئێك كورسی ژی بۆ پارێزگەها دهۆكێ.
