ب هەلكەفتا بیرەوەرییا 49 سالییا شۆڕەشا گۆلانێ نێچیرڤان بارزانی، سەرۆكێ هەرێما كوردستانێ پەیامەك بەلاڤكر.
دەقێ پەیاما نێچیرڤان بارزانی:
” د دەمەكیدا ئەڤرۆ یادا 49 سالییا بەرپابوونا شۆڕەشا گۆلانێ دکەین، ب ڕێزڤە شەھیدێن نەمر و ھەموو وان قارەمان و جوامێران ب بیردئینین یێن د ڤێ شۆڕەشا مەزندا گیان و خوینا خۆ ل پێناڤی ئازادییێدا بەخشین.
شۆڕەشا گۆلانێ وەکو درێژەپێدەرا شۆڕەشا مەزن یا ئەیلوولێ ب ڕابەراتییا بارزانییێ نەمر، نموونەیەکا بێ وێنە بوو ژ ئیرادەیا گەلەکی کو بۆ ڕەتکرنا ستەم و داگیرکارییێ، چ جاران دەست نەداهێلاین. د شۆڕەشا گۆلانێدا گەلێ کوردستانێ دووبارە سەلماند کو ل پێناڤی پاراستنا هەبوون و ئازادییا خۆ، بۆ ھەموو قۆربانیدانەکێ یێ ئامادەیە.
د ڤێ یادێدا دووپاتدکەین کو ئەرکێ مە ھەموویانە میراتێ شەھیدان و فیدرالی و دەستکەفتێن دەستووری بپارێزین و ب ئێكڕێزی و ھاریكارییێ درێژییێ ب ڕێیا وان بدەین، بلا یادا شۆڕەشا گۆلانێ زێدەتر ھاندەرێ مە بیت بۆ تەبایی و پێکڤەییێ، هەتا ب کارێ ھەڤپشك و ھاریکارییێ، بەرەڤ پاشەڕۆژەكا باشتر پێنگاڤان بهاڤێژین.
بلند و شکۆدار بیت یادا شۆڕەشا گۆلانێ، دروود بۆ گیانێ پاک یێ شەھیدان، سلاڤ ل ھەموو پێشمەرگەیێن قەهرەمان یێن کوردستانێ. “
